Bahodir Esanov “Eng yaxshi buxgalter – 2025” tanlovida g‘olib bo‘ldi

Toshkent, O‘zbekiston (UzDaily.uz) — O‘zbekiston auditorlar palatasi hamda O‘zbekiston buxgalterlar va auditorlar milliy assotsiatsiyasi tomonidan an’anaviy tarzda o‘tkaziladigan “Eng yaxshi buxgalter” ko‘rik-tanlovida 2025 yil yakunlariga ko‘ra Bahodir Esanov 1-o‘ringa munosib deb topildi.

Mazkur tanlov sohada o‘ziga xos nufuzga ega bo‘lib, unda buxgalteriya hisobi va moliyaviy tahlil bo‘yicha bilim, amaliy tajriba, zamonaviy yondashuv, kasbiy etika va mas’uliyat kabi mezonlar asosida eng yaxshi mutaxassislar aniqlanadi.

Tanlovning muntazam o‘tkazilishi sohaga shaffof baholash tizimi joriy etilishiga xizmat qilmoqda hamda buxgalter kasbining obro‘sini oshirishga hissa qo‘shmoqda.

Ta’lim va xalqaro tajriba

Bahodir Esanov 2009–2013 yillarda Toshkent moliya institutida tahsil olib, moliya va hisob yo‘nalishlarida chuqur nazariy bilimga ega bo‘lgan. Keyinchalik bank tizimidagi faoliyati davomida moliyaviy intizom, hujjatlar bilan ishlash madaniyati, hisob-kitoblar aniqligi va risklarni baholash borasidagi amaliy ko‘nikmalarini mustahkamlagan.

Keyingi bosqichda u Birlashgan Arab Amirliklaridagi Masdar kompaniyasida faoliyat yuritib, xalqaro ish muhiti va biznes standartlari bilan ishlash tajribasini to‘pladi. Ushbu tajriba mutaxassisning dunyoqarashini kengaytirib, zamonaviy menejment va hisob-kitob yondashuvlarini puxta o‘zlashtirishga imkon bergan.

Kasbiy malaka va sertifikatlar

Bahodir Esanov Soliq maslahatchisi sertifikati, shuningdek, xalqaro darajadagi CAP (Certified Accounting Practitioner) sertifikatiga ega. Ushbu malakalar buxgalteriya amaliyoti, moliyaviy hisobot yuritish va professional standartlarga rioya etish bo‘yicha yuqori darajadagi tayyorgarlikni tasdiqlaydi.

Biznesga yaqin xizmat: 80 dan ortiq mijozga ko‘mak

Bugungi kunda Bahodir Esanov — Consulting Partners kompaniyasi ta’sischilaridan biri. Kompaniya professional buxgalteriya, yuridik va HR xizmatlarini ko‘rsatishga ixtisoslashgan. Esanov boshchiligidagi jamoa 80 dan ortiq kichik va o‘rta biznes subyektlariga buxgalteriya yuritish, soliq maslahati va hisobotlarni to‘g‘ri tashkil etish bo‘yicha xizmatlar ko‘rsatib kelmoqda.

Bozorda raqobat kuchaygan hozirgi sharoitda tadbirkorlar uchun puxta hisob-kitob, o‘z vaqtida tayyorlangan hisobotlar, soliq risklarini kamaytirish va moliyaviy intizom barqaror o‘sishning asosiy shartiga aylangan. Shu nuqtai nazardan, amaliy yechim bera oladigan va biznes bilan bir tilda muloqot qila oladigan mutaxassislar qadri ortib bormoqda. Bahodir Esanov faoliyati aynan shu ehtiyojga mos kelishi bilan ajralib turadi.

G‘alaba — kasbiy mehnat e’tirofi

“Eng yaxshi buxgalter – 2025” tanlovidagi g‘alaba Esanovning ko‘p yillik mehnati, izchil ta’limi, bank va xalqaro tajribasi, shuningdek, amaliy xizmatlari e’tirofi sifatida baholanmoqda. Bu natija nafaqat shaxsiy muvaffaqiyat, balki mamlakatda buxgalteriya va soliq maslahati sohasida professional yondashuv va sifatli xizmatlarning ahamiyati ortib borayotganidan dalolat beradi.