BAAda o‘zbek fuqarolariga ravvinni o‘ldirganlik uchun o‘lim jazosi berildi

Toshkent, O‘zbekiston (UzDaily.uz) — Birlashgan Arab Amirliklari (BAA) sudi ravvin Svi Koganni o‘ldirganlikda ayblangan uch nafar O‘zbekiston fuqarosini o‘lim jazosiga hukm qildi. Jinoyatni tashkil etishda ishtirok etgan deb topilgan yana bir shaxs esa umrbod qamoq jazosiga hukm qilindi.

Ravvin Svi Kogan — Isroil va Moldova fuqarosi bo‘lib, Abu-Dabidagi “Xabad” yahudiy harakatining vakili sifatida faoliyat yuritgan. U 2020 yilda Isroil va BAA o‘rtasidagi munosabatlar normallashtirilgandan keyin ushbu mamlakatga ko‘chib kelgan. 2024 yil 21 noyabrda u alaqaga chiqmay qolgan va ikki kundan keyin qidiruvga berilgan. Keyinchalik uning jasadi zo‘ravonlik alomatlari bilan topilgan.

Marhumning avtomobili Abu-Dabidan 150 kilometr uzoqlikda, urush izlari bilan aniqlangan.

Bir necha kun o‘tgach, huquq-tartibot organlari uch nafar o‘zbek fuqarosining qo‘lga olingani haqida maʼlum qildi. Tergov davomida gumonlanuvchilar jabrdiyda harakatlarini avvaldan kuzatib, uni o‘ldirishni rejalashtirgani aniqlangan.

Sud jarayoni Abu-Dabi Federal apellyatsiya sudining davlat xavfsizligi palatasida o‘tkazilib, shu yerda hukm chiqarilgan.

Maʼlumot o‘rnida, BAAda o‘lim jazosi qonuniy hisoblanadi. Mamlakat huquqiy tizimi islomiy shariat qoidalari va fuqarolik qonunchiligi asosida ishlaydi. Unga ko‘ra, qotillik, terrorizm, davlatga xiyonat, josuslik va giyohvand moddalarning noqonuniy aylanmasi uchun oliy jazo — o‘lim hukmi qo‘llanilishi mumkin.

BAAda o‘lim hukmi majburiy tarzda qayta ko‘rib chiqiladi va tegishli amirlik hukmdori tomonidan tasdiqlanishi kerak. Shu bilan birga, hukmlar kamdan-kam hollarda ijro etiladi, ko‘pincha ular umrbod qamoq jazosiga almashtiriladi. Agar o‘lim jazosi ijro etilsa, otish orqali qatl qilish usuli qo‘llaniladi.