BAA 2026 yilda O‘zbekistonning JSTga kirishini qo‘llab-quvvatlashini tasdiqladi

Toshkent, O‘zbekiston (UzDaily.uz) — O‘zbekiston Prezidentining Jahon savdo tashkiloti masalalari bo‘yicha vakili va bosh muzokarachi Azizbek Urunov BAA tashqi savdo vaziri doktor Tani Al Zayudiy bilan samarali uchrashuv o‘tkazdi.

Tomonlar jahon savdosidagi dolzarb tendensiyalar, JST faoliyati va tashkilotda olib borilayotgan islohotlarni muhokama qildilar. Doktor Tani Al Zayudiy BAAning ko‘p tomonlama savdo tizimini qo‘llab-quvvatlash borasidagi pozitsiyasini yana bir bor tasdiqlab, kelgusi yili O‘zbekistonning JSTga qo‘shilishiga ko‘mak berishga tayyorligini bildirdi.

Azizbek Urunov tashkilotga muvaffaqiyatli kirish O‘zbekiston va BAA o‘rtasida savdo-iqtisodiy hamkorlikni rivojlantirishda yangi imkoniyatlar ochib berishini va mintaqa doirasidagi sheriklikni kengaytirishga turtki bo‘lishini taʼkidladi.

Muzokaralar ikki tomonlama munosabatlarni mustahkamlash va global iqtisodiy tizim doirasidagi o‘zaro hamkorlikning strategik ahamiyatini ko‘rsatib berdi.