AQSHdan O‘zbekistonga yana 72 fuqaro deportatsiya qilindi

Toshkent, O‘zbekiston (UzDaily.uz) — 11 mart kuni AQSHdan O‘zbekistonga yana bir deportatsiya reysi keldi, samolyotda AQSHda qonuniy asossiz turgan 72 nafar O‘zbekiston fuqarosi bor edi. Bu haqda Toshkentdagi AQSH elchixonasi xabar berdi.

O‘zbekiston Tashqi ishlar vazirligi maʼlumotlariga ko‘ra, ushbu reys orqali 65 nafar O‘zbekiston fuqarosi vataniga qaytarildi.

Elchixona maʼlumotlarida aytilishicha, mazkur reys AQSH tomonidan davlat chegaralari xavfsizligini taʼminlash uchun amalga oshirilayotgan chora-tadbirlar qatoriga kiradi.

Diplomatik manba maʼlumotlariga ko‘ra, AQSH prezidenti Donald Tramp lavozimga kirishganidan so‘ng mamlakatdan 1000 dan ortiq O‘zbekiston fuqarosi deportatsiya qilingan.

«AQSHga noqonuniy kirgan shaxslarga qamoq va deportatsiya tahdidi mavjud. AQSH deportatsiya operatsiyalarida ko‘rsatilgan hamkorlik uchun O‘zbekiston hukumatiga chuqur minnatdorlik bildiradi», — deyiladi xabarda.

Yanvar oyida ham Toshkentga AQSHdan 44 nafar O‘zbekiston fuqarosi repatriatsiya reysi orqali kelgan edi. Ularning ko‘pchiligi AQSH-Meksika chegarasidan o‘tganidan keyin migratsiya markazlarida bo‘lgan. O‘shanda xabar berildiki, bu Donald Tramp hokimiyatga kelgandan keyingi 11-reys bo‘lib, shular orqali qariyb 700 kishi vataniga qaytarilgan.

Ushbu reys ham avvalgi reyslar kabi Omni Air International amerikalik charter aviakompaniyasi tomonidan amalga oshirilgan. Samolyot tushdan keyin Toshkentga qo‘ndi.