Toshkent, O‘zbekiston (UzDaily.uz) — Shu haftada Nyu-Yorkdan Toshkentga yana o‘n nafar O‘zbekiston fuqarosining deportatsiya qilinishi kutilmoqda. Bu haqda respublika Tashqi ishlar vazirligi matbuot kotibi Ahror Burhanov maʼlum qildi.

Aslida, AQSH hokimiyati mazkur fuqarolarni Kosta-Rikaga yuborishni rejalashtirgan edi. Biroq, O‘zbekiston va AQSH tomonlari o‘rtasidagi muzokaralar natijasida ularni vatanga qaytarish bo‘yicha kelishuvga erishildi.

Bundan avval, 24 fevral kuni, AQSH Kosta-Rikaga deportatsiya qilishni rejalashtirgan yana yetti nafar o‘zbekistonlik fuqaro vatanga qaytarilgan edi.

Oxirgi haftalarda AQSH bir nechta deportatsiya reyslarini amalga oshirib, Osiyo mamlakatlaridan, jumladan O‘zbekistondan ham yuzlab migrantlarni Panama va Kosta-Rikaga yuborgan.

Vaziyat yuzasidan izoh bergan TIV O‘zbekiston fuqarolarining xavfsiz qaytishi taʼminlanishini maʼlum qildi. Shuningdek, vazirlik AQSH va Lotin Amerikasi davlatlari hokimiyatlari bilan doimiy muloqotda ekanligini taʼkidladi.

TIV shuningdek, AQSHdagi O‘zbekiston diplomatik vakolatxonalari o‘z vatandoshlariga, ular qayerda bo‘lishidan qatʼi nazar, har tomonlama yordam ko‘rsatishga tayyor ekanligini qayd etdi.