Toshkent, O‘zbekiston (UzDaily.uz) — AQSH O‘zbekistondan import qilinadigan tovarlarga 10% boj joriy etdi

2025 yil 2 aprelda AQSH prezidenti Donald Tramp 150 dan ortiq davlat, jumladan, O‘zbekistondan kelayotgan mahsulotlarga yangi tariflar joriy etilganini eʼlon qildi.

Belgilangan qoidalarga ko‘ra, ko‘pchilik davlatlar uchun bojxona stavkasi 10% etib belgilandi. Shu bilan birga, ayrim davlatlar uchun bu miqdor ancha yuqori: Xitoy va Tayvan uchun 32%, Yevropa Ittifoqi uchun 20%, Hindiston uchun esa 26% tashkil qiladi. Bundan tashqari, barcha avtomobillar importi uchun yagona 25%lik tarif joriy etildi.

O‘zbekiston mahsulotlari uchun esa 10%lik boj stavkasi belgilandi.

Donald Tramp o‘z chiqishida bu qarorni "Iqtisodiy mustaqillik deklaratsiyasi" deb atadi va 2 aprelni "Ozodlik kuni" deb eʼlon qildi. Uning so‘zlariga ko‘ra, bu choralar adolatsiz savdo amaliyotlarini tugatish va AQSHdagi ish o‘rinlarini himoya qilishga qaratilgan.

Vashingtonning qarori xalqaro hamjamiyatda keskin reaksiyaga sabab bo‘ldi. Yevropa Komissiyasi raisi Ursula fon der Lyayen yangi bojlarni tanqid qilib, ularni global iqtisodiyot uchun jiddiy tahdid deb baholadi. Shuningdek, Yevropa Ittifoqi bu choralarga javob qaytarishga tayyorlanayotganini maʼlum qildi.

Iqtisodchilarning taʼkidlashicha, tariflarning oshirilishi AQSH isteʼmolchilari uchun narxlarning o‘sishiga va nafaqat Amerika, balki boshqa davlatlar iqtisodiyotining sekinlashishiga olib kelishi mumkin. Birja bozorlari esa Trampning eʼloniga keskin pasayish bilan javob berdi.

O‘zbekiston uchun 10%lik boj joriy etilishi AQSHga eksportga salbiy taʼsir ko‘rsatishi mumkin, ayniqsa, tekstil sanoati va qishloq xo‘jaligi kabi tarmoqlarga. Amerika bozoriga yo‘naltirilgan kompaniyalar yangi sharoitlarga moslashish yoki savdo yo‘nalishlarini o‘zgartirishga majbur bo‘ladi.

2024 yil yakunlariga ko‘ra, O‘zbekiston va AQSH o‘rtasidagi tovar ayirboshlash hajmi $881,7 mln ga yetdi, 2023 yilda esa bu ko‘rsatkich $765,1 mln ni tashkil qilgan edi. 2024 yilda O‘zbekistonning AQSHga eksporti $317,4 mln gacha o‘sdi (2023 yilda $253,1 mln bo‘lgan), AQSHdan import esa $564,3 mln ga yetdi (2023 yilda $512 mln edi).