AQSH elchixonasi FIFA PASS bo‘yicha tushuntirish berdi

Toshkent, O‘zbekiston (UzDaily.uz) — AQSHning O‘zbekistondagi elchixonasi 2026 yilgi futbol bo‘yicha jahon chempionatiga boradigan o‘zbekistonlik muxlislar uchun FIFA PASS ustuvor ro‘yxatga yozish tizimidan foydalanish tartibini tushuntirdi. Ushbu tizim chipta egalariga vizaviy suhbatni kutish vaqtlarini qisqartirish imkonini beradi.

Dasturda ishtirok etish uchun FIFAning rasmiy sayti orqali xarid qilingan chiptaga ega bo‘lish talab etiladi. fifa.com/tickets saytidagi shaxsiy kabinet orqali FIFA PASS dasturida ishtirok etish uchun rozilik shaklini yuborish lozim. Bunda ism va pasport raqami xorijga chiqish pasporti maʼlumotlari bilan to‘liq mos kelishi muhim.

Shundan so‘ng ariza beruvchi AQSH Davlat departamentining rasmiy vizaviy portalida DS-160 onlayn anketasini to‘ldirishi kerak. Unda ko‘rsatilgan pasport maʼlumotlari FIFA profilidagi maʼlumotlar bilan to‘liq bir xil bo‘lishi shart.

Viza to‘lovi amalga oshirilib, musobaqa chiptasi mavjudligi tizim orqali tasdiqlanganidan keyin ariza beruvchi suhbat uchun ustuvor navbatga kirish imkoniga ega bo‘ladi.

Elchixona taʼkidlashicha, ushbu yengillashtirilgan tartib xavfsizlik bo‘yicha standart talablarni bekor qilmaydi. Chipta mavjudligi vizaning kafolatli berilishini anglatmaydi — yakuniy qaror shaxsiy suhbat jarayonida konsullik xodimi tomonidan qabul qilinadi.

Ariza beruvchilarga aniq maʼlumot taqdim etish va suhbat davomida beriladigan savollarga tayyor bo‘lish tavsiya etildi.

Futbol bo‘yicha Jahon chempionati 2026 O‘zbekiston uchun tarixiy voqea bo‘ladi. Milliy terma jamoa ilk bor jahon chempionatiga yo‘llanma qo‘lga kiritdi va bu holat xorijiy ommaviy axborot vositalari tomonidan mamlakat uchun muhim yutuq sifatida eʼtirof etildi.