Andijon viloyati Afg‘onistonda 32 ta kelishuv imzoladi

Toshkent, O‘zbekiston (UzDaily.uz) — Andijon viloyati delegatsiyasi hokim Shuxratbek Abduraxmonov boshchiligida Afg‘onistonga amaliy tashrifini davom ettirmoqda. Tashrif doirasida ikki mamlakat xususiy sektor vakillari o‘rtasida qator biznes uchrashuvlar o‘tkazildi.

Uchrashuvlarda o‘zbek delegatsiyasi aʼzolari, afg‘on tadbirkorlari va ommaviy axborot vositalari vakillari ishtirok etdi.

Forum davomida viloyat rahbari Andijon viloyatining iqtisodiy salohiyatini taqdim etib, investitsiyalar uchun qulay shart-sharoitlar va istiqbolli rivojlanish yo‘nalishlarini taʼkidladi. Qatnashchilar hamkorlikni kengaytirish va savdo-iqtisodiy aloqalarni mustahkamlash masalalarini muhokama qildilar.

Biznes tadbirlar yakunlari bo‘yicha B2B muzokaralar o‘tkazilib, umumiy qiymati 813 mln AQSH dollariga teng bo‘lgan 32 ta kelishuv imzolandi. Ushbu kelishuvlar O‘zbekiston va Afg‘oniston o‘rtasidagi iqtisodiy hamkorlikning sezilarli darajada kengayganini aks ettiradi.

Qobuldagi tadbirlar yakunlanganidan so‘ng delegatsiya Hirot shahriga yetib bordi va u yerda mahalliy hokimiyat vakillari tomonidan kutib olindi. Tashrif doirasida Andijon viloyati hokimi Hirot viloyati rahbariyati bilan uchrashuv o‘tkazib, tomonlar hududlararo hamkorlikni rivojlantirish, savdo hajmini oshirish va qo‘shma investitsiya loyihalarini amalga oshirish masalalarini muhokama qildilar.

Tashrif doirasida alohida ahamiyatga ega tadbirlardan biri Hirot shahrida tashkil etilgan Andijon viloyati mahsulotlari ko‘rgazmasi bo‘ldi. Unda rasmiy delegatsiyalar va Savdo-sanoat palatasi vakillari ishtirok etdi.

Ekspozitsiyada 200 dan ortiq turdagi mahsulotlar, jumladan qishloq xo‘jaligi tovarlari, oziq-ovqat mahsulotlari, qurilish materiallari va maishiy texnika namoyish etildi.

Ko‘rgazma o‘zbek mahsulotlarini tashqi bozorlarga ilgari surish va ikki mamlakat tadbirkorlari o‘rtasidagi ishbilarmonlik aloqalarini mustahkamlash uchun muhim maydon bo‘ldi.