“Agat Credit“ uchinchi obligatsiya emissiyasini joylashtiradi va mikromoliyaviy bankka aylanadi

Toshkent, O‘zbekiston (UzDaily.uz) — 2025-yil 23-oktabr kuni “Agat Credit” MMTning uchinchi obligatsiya emissiyasi davlat ro‘yxatidan o‘tkazildi. Kompaniya investorlarga 40 mlrd so‘m miqdorida obligatsiyalarni yillik 27% kupon daromadi bilan taklif etadi.

Qimmatli qog‘ozlarning muomalada bo‘lish muddati — 365 kun, nominal qiymati — 100 000 so‘m. Kupon to‘lovlari har oyda amalga oshiriladi. Joylashtirish 2025-yil 7-noyabrda boshlanadi.

Kompaniya uchun bu 2025-yildagi uchinchi emissiya bo‘ladi. Mart oyida joylashtirilgan birinchi emissiya hajmi 40 mlrd so‘m bo‘lib, daromadliligi 29% ni tashkil etgan. Iyul oyida chiqarilgan ikkinchi emissiya esa 30 mlrd so‘m hajm va 28% daromadlilik bilan atigi uch soat ichida investorlar tomonidan to‘liq sotib olingan.

Bundan tashqari, 2025-yil 10-oktabr kuni aksiyadorlarning navbatdan tashqari yig‘ilishida “Agat Credit” AJ MMTni “Agat Credit Mikromoliyaviy banki” AJga aylantirish to‘g‘risida qaror qabul qilindi. Kompaniya ushbu o‘zgarish uchun regulyatordan ruxsat olish jarayonini boshlagan.

Investorlar uchun bu — yuqori daromad izlayotganlar uchun jozibador imkoniyat. ”Agat Credit” obligatsiyalari yuqori kupon daromadi va bozorda o‘zini ishonchli emitent sifatida ko‘rsatgan kompaniyaning barqarorligini o‘zida uyg‘unlashtiradi. Obligatsiyalarni 2025-yil 7-noyabrdan boshlab “Goinvest” ilovasi orqali xarid qilish mumkin bo‘ladi.