Afg‘onistonda magnitudasi 6 bo‘lgan zilzila yuz berdi, yer osti silkinishlari O‘zbekistonda ham sezildi

Toshkent, O‘zbekiston (UzDaily.uz) — 2025 yil 19 dekabr kuni mahalliy vaqt bilan soat 10:39 da Afg‘oniston hududida, Taxor viloyatida magnitudasi 6 bo‘lgan zilzila sodir bo‘ldi. Epitsentr 105 kilometr chuqurlikda joylashgan bo‘lib, uning koordinatalari 36,31 shimoliy kenglik va 69,28 sharqiy uzunlikni tashkil etdi.

Yer osti silkinishlari O‘zbekistonning turli hududlarida sezilib, seysmik intensivlik shkalasi bo‘yicha quyidagicha baholandi: Surxondaryo viloyatida 4 ball, epitsentrdan 206 kilometr masofada; Qashqadaryo va Samarqand viloyatlarida 3 ball, 417–423 kilometr masofada; Jizzax, Sirdaryo va Farg‘ona viloyatlarida 2–3 ball, 441–502 kilometr masofada; Navoiy viloyati, Toshkent shahri, Namangan va Andijon viloyatlarida 2 ball, 542–564 kilometr masofada.

Epitsentrdan mamlakat poytaxtigacha bo‘lgan masofa janubi-sharq yo‘nalishida taxminan 551 kilometrni tashkil etadi.

Dastlabki maʼlumotlarga ko‘ra, O‘zbekiston hududida jiddiy vayronalar yoki jabrlanganlar haqida xabarlar kelib tushmagan.