AFD va O‘zbekiston 2025 yil oxirigacha 300 million yevro qiymatida yangi kelishuvlarni imzolashni rejalashtirmoqda

Toshkent, O‘zbekiston (UzDaily.uz) — Fransiya taraqqiyot agentligi (AFD) va O‘zbekiston 2025 yilning oxirigacha 300 million yevro qiymatida yangi kelishuvlarni imzolashni rejalashtirmoqda. Bu haqda agentlikning Markaziy va Sharqiy Osiyo bo‘yicha mintaqaviy direktori Ameli Ober mamlakatga tashrifi davomida maʼlum qildi.

Ameli Oberning taʼkidlashicha, AFD O‘zbekistonda o‘n yildan beri faoliyat yuritib kelmoqda. Shu vaqt mobaynida agentlik iqtisodiyotning turli sohalaridagi 13 ta loyihani qo‘llab-quvvatlash uchun 1,6 milliard yevrodan ortiq mablag‘ yo‘naltirgan. Faoliyat yo‘nalishlari orasida energetika, qishloq xo‘jaligi, infratuzilmani modernizatsiya qilish va ijtimoiy dasturlar mavjud.

AFD o‘z faoliyati doirasida O‘zbekiston hukumati bilan yaqin hamkorlikda ishlaydi, ekspertlar yordamini taqdim etadi hamda Proparco va Expertise France kabi docher kompaniyalari orqali xususiy investitsiyalarni jalb qiladi. Ushbu tuzilmalarning O‘zbekistonga yo‘naltirgan umumiy investitsiya hajmi mos ravishda 213 million yevro va 20 million yevroga teng.

Ameli Ober taʼkidlaganidek, AFD O‘zbekiston bilan uzoq muddatli hamkorlikdan faxrlanadi hamda mamlakatda kambag‘allik darajasini kamaytirish bo‘yicha erishilgan katta yutuqlarni yuqori baholaydi. U, shuningdek, O‘zbekistondagi islohotlar darajasi va rivojlanish surʼatlarini yuqori baholab, o‘zaro hamkorlik yaqin va uzoq muddatli istiqbolda ikki davlat o‘rtasidagi munosabatlarni mustahkamlashga xizmat qilishini taʼkidladi.

Energetika sohasida AFD qayta tiklanuvchi energiyaga investitsiya kiritish uchun qulay sharoit yaratishga qaratilgan islohotlarni amalga oshirishni qo‘llab-quvvatlamoqda. Shu bilan birga, agentlikning docher tuzilmasi Proparco bu yo‘nalishda beshta loyihaga sarmoya kiritgan. Bundan tashqari, agentlik elektr tarmoqlarini modernizatsiya qilish va turar-joy binolarining energiya samaradorligini oshirishni moliyalashtirmoqda. Bu maqsadda 30 million yevro miqdorida mablag‘ uy-joylarni izolyatsiya qilish va boshqa choralar uchun kredit sifatida ajratilgan.

Qishloq xo‘jaligi sohasida agentlik mamlakat bo‘ylab yirik va kichik fermer xo‘jaliklarini qo‘llab-quvvatlash uchun 100 million yevro qiymatida loyiha amalga oshirmoqda. Bu loyiha to‘rtta milliy bank orqali kreditlar berishni nazarda tutadi.

Qoraqalpog‘istonda esa 24 ming gektar maydonda saksaul, shuningdek, qo‘shimcha 4–5 ming gektar yerda boshqa o‘simliklarni ekish bo‘yicha loyiha imzolashga tayyorlanmoqda. Bu tashabbus ekologik inqiroz oqibatlarini yumshatish va mintaqada aholi turmush sharoitini yaxshilashga xizmat qiladi.

Ameli Ober taʼkidlaganidek, AFD hamkorlikni kengaytirish, islohotlarni qo‘llab-quvvatlash, energetika, qishloq xo‘jaligi, suv taʼminoti va sanitariya dasturlarini rivojlantirish, shuningdek, ijtimoiy himoyani kuchaytirishga intiladi. Bu orqali aholining biror toifasi islohotlar jarayonidan chetda qolmasligi taʼminlanadi.

Agentlik erishilgan tajribadan foydalanib, o‘z loyihalarining samaradorligini yana-da oshirish va O‘zbekiston fuqarolari uchun amaliy foyda keltirishga qaratilgan faoliyatni davom ettirishni rejalashtirmoqda.