Abduqodir Husanov «Manchester Siti»da oy o‘yinchisiga nomzod

Toshkent, O‘zbekiston (UzDaily.uz) — O‘zbekiston terma jamoasi himoyachisi Abduqodir Husanov «Manchester Siti»da mart oyining eng yaxshi futbolchisi bo‘lishga nomzodlar qatoriga kiritildi.

O‘zbekiston milliy terma jamoasi himoyachisi Abduqodir Husanov «Manchester Siti» klubida mart oyining eng yaxshi futbolchisi sovriniga nomzodlar ro‘yxatiga kiritildi.

Klubning rasmiy rasmiy saytida ovoz berish uchun uch nafar nomzod — Husanov, Jeremi Doku va Rodri taqdim etilgan.

G‘olib 1 aprelga qadar davom etadigan ovoz berish yakunlariga ko‘ra aniqlanadi. Ovoz berishda ishtirok etish uchun muxlislar klub platformasida ro‘yxatdan o‘tishlari lozim.

Klubda o‘zbek himoyachisining mart oyidagi o‘yini yuqori baholandi. Qayd etilishicha, futbolchining yoshi 22 da bo‘lishiga qaramay, u tajribali o‘yinchiga xos darajada yetuk va ishonchli o‘yin namoyish etmoqda, go‘yoki Angliya Premyer-ligasida yuzlab o‘yinlarda qatnashgandek taassurot qoldiradi.

Shuningdek, markaziy himoyachi har bir uchrashuvda barqaror va ishonchli harakat qilib, o‘z formasini tobora yaxshilab borayotgani taʼkidlangan. Uning kuchli jihatlari sifatida o‘yinni o‘qish, to‘pni o‘z vaqtida olib qo‘yish va o‘z darvozasi oldidagi xavfli holatlarni samarali bartaraf etish qobiliyati alohida ko‘rsatib o‘tilgan.

Klub mutaxassislari Husanovning tezligiga ham alohida eʼtibor qaratgan. Ushbu sifat jamoa himoyasida muhim ahamiyat kasb etib, ayrim hollarda bu ko‘rsatkichlar Kayl Uoker darajasida baholanmoqda.

Mart oyi davomida Husanov Yevropaning yetakchi klublari hujumchilariga qarshi muvaffaqiyatli o‘yin namoyish etib, o‘zining yuqori salohiyatini yana bir bor tasdiqladi. U avval ham oyning eng yaxshi futbolchisi sovriniga sazovor bo‘lgan — 2025 yil fevral va 2026 yil yanvar oylarida, shuningdek joriy yil yanvar oyida «Etihad Player of the Month» mukofotini qo‘lga kiritgan.