Abdulaziz Aqqulov O‘zbekiston Turizm qo‘mitasi raisi etib tayinlandi

Toshkent, O‘zbekiston (UzDaily.uz) — Abdulaziz Aqqulov O‘zbekiston Turizm qo‘mitasi raisi lavozimiga tayinlandi. Bu haqda mamlakat Prezidenti matbuot kotibi Sherzod Asadov maʼlum qildi.

O‘z navbatida, Umid Shadiyev boshqa ishga o‘tishi munosabati bilan Ekologiya, atrof-muhitni muhofaza qilish va iqlim o‘zgarishi vazirligi huzuridagi Turizm qo‘mitasi raisi lavozimidan ozod etildi.

Yangi tayinlovga qadar Abdulaziz Aqqulov 2022 yilning aprel oyidan buyon O‘zbekistonning BAAdagi elchisi sifatida ishlab kelayotgan edi.

Aqqulov 1985 yilda tug‘ilgan, Toshkent davlat iqtisodiyot universitetini «Xalqaro turizm boshqaruvi» mutaxassisligi bo‘yicha tamomlagan. U 2006 yildan beri Turizmni rivojlantirish davlat qo‘mitasida turli lavozimlarda faoliyat yuritgan.

2018 yil noyabrdan 2020 yil fevralgacha qo‘mita raisi vazifasini vaqtincha bajaruvchi bo‘lgan, so‘ngra raisning birinchi o‘rinbosari etib tayinlangan, 2021 yil aprelida esa turizm va sport vaziri o‘rinbosari lavozimini egallagan edi.