21 martdan Saudiya Arabistoni hajga tayyorgarlik munosabati bilan umra vizalari berishni to‘xtatadi

Toshkent, O‘zbekiston (UzDaily.uz) — 2026 yil 21 martdan Saudiya Arabistoni hajga tayyorgarlik ko‘rilishi munosabati bilan umra vizalarini berishni vaqtincha to‘xtatadi. Bu haqda Haj va umra vazirligi rasmiy saytida eʼlon qilingan rasmiy kalendar jadvalida maʼlum qilingan.

Mavsum uchun belgilangan sanalarga ko‘ra, 20 mart umra vizalarini olish uchun so‘nggi kun hisoblanadi, 3 aprel esa xorijiy ziyoratchilarning mamlakatga kirishi uchun oxirgi muddat etib belgilangan.

Barcha ziyoratchilar 18 apreldan kechiktirmay Saudiya Arabistoni hududini tark etishi lozim, shundan so‘ng haj tugagunga qadar umra amalini bajarish vaqtincha to‘xtatiladi.

Haj va umra vazirligi mazkur chora-tadbirlar hajni xavfsiz va tartibli o‘tkazishni taʼminlashga qaratilganini taʼkidlab, umra mavsumi haj yakunlanganidan so‘ng qayta boshlanishini maʼlum qildi.