2026 yil boshiga kelib banklarining kreditlash hajmi 604 trln so‘mdan oshdi

Toshkent, O‘zbekiston (UzDaily.uz) — O‘zbekiston tijorat banklarining kredit portfeli barqaror o‘sishni namoyon etmoqda va bank tizimida kredit faolligi yuqori darajada saqlanayotganini ko‘rsatmoqda. Bu haqda O‘zbekiston Respublikasi Markaziy banki maʼlum qildi.

Regulyator maʼlumotlariga ko‘ra, so‘nggi ikki yil davomida tijorat banklari tomonidan berilgan kreditlarning jami hajmi izchil ravishda oshib borgan va 2026 yil boshiga kelib 604 trln so‘mga yetgan. Bu 2024 yil ko‘rsatkichiga nisbatan qariyb 28 foizga ko‘p bo‘lib, iqtisodiyotni moliyalashtirish hajmlarining barqaror kengayayotganini aks ettiradi.

Kredit portfeli tarkibida milliy valyutadagi kreditlar ulushi o‘sishda davom etmoqda. 2026 yil boshi holatiga ko‘ra, ushbu ko‘rsatkich ikki yil avvalgi 55 foizga nisbatan 61 foizni tashkil etdi. Bunday dinamika so‘mda kreditlash hajmlarining bosqichma-bosqich oshirilishi va valyuta zayomlariga bo‘lgan qaramlikning kamayishi bilan izohlanadi.

Milliy valyutadagi kreditlarning salmoqli qismi jismoniy shaxslar hissasiga to‘g‘ri keladi. Aholini isteʼmol kreditlash ichki talab va iqtisodiy faollikni qo‘llab-quvvatlovchi asosiy omillardan biri bo‘lib qolmoqda.

Ayni paytda chet el valyutasidagi kreditlar asosan korxonalarga yo‘naltirilmoqda va eksport-import operatsiyalarini moliyalashtirish uchun foydalanilmoqda.

Regulyator, shuningdek, kreditlarning asosiy qismi uzoq muddatli ekanini qayd etdi: ularning ulushi 88 foizga yetadi.

Bu banklar tomonidan investitsiya loyihalariga, ipoteka kreditlashga va biznesni uzoq muddatli rivojlantirishga ustuvor eʼtibor qaratilayotganini ko‘rsatadi.

Umuman olganda, kredit portfelining izchil kengayib borishi O‘zbekiston iqtisodiyotida ichki talabning kuchayishi va investitsiya faolligining oshishini aks ettirmoqda.