2025 yilning to‘qqiz oyi mobaynida Wildberries orqali Rossiya tovarlarining O‘zbekistonga importi 25 foizga oshdi

Toshkent, O‘zbekiston (UzDaily.uz) — 2025 yil yanvar—sentyabr oylari davomida Wildberries onlayn-platformasi orqali Rossiyadan O‘zbekistonga import qilingan tovarlar hajmi o‘tgan yilning shu davriga nisbatan 25 foizga ko‘paydi. Bu haqda Wildberries‘ning O‘zbekistondagi direktori Akmal Primqulov Rossiya va O‘zbekiston mintaqalari II Kengashi doirasida maʼlum qildi.

Uning so‘zlariga ko‘ra, elektron savdo ikki davlat o‘rtasidagi iqtisodiy hamkorlikning asosiy drayverlaridan biriga aylanmoqda. Eng tez o‘sish ko‘rsatgan tovar turlari — poyabzal (+110%), kiyim-kechak (+63%), aksessuarlar (+47%), go‘zallik vositalari (+41%), idish-tovoq va xo‘jalik jihozlari (+32%), o‘yinchoqlar (+35%) hamda kanselyáriya tovarlari (+22%) bo‘ldi.

«O‘zbekiston va Rossiyaning elektron tijorat sohasidagi hamkorligi raqamli texnologiyalar iqtisodiy rivojlanishga qanday xizmat qilishi mumkinligini namoyon etmoqda. Elektron savdoni yana-da rivojlantirish hamda qo‘shma infratuzilma va meʼyoriy mexanizmlarni yaratish eksport hajmini oshirish, bozorlarni diversifikatsiya qilish va iqtisodiy aloqalarni yangi texnologiyaviy bosqichga olib chiqishga yordam beradi», — dedi Primqulov.

Eksport yo‘nalishida ham ijobiy surʼat kuzatilmoqda: 2025 yilning to‘qqiz oyi davomida O‘zbekiston tovarlarining Wildberries platformasidagi sotuv hajmi 2024 yilning shu davriga nisbatan 37 foizga oshdi.

Eng yuqori o‘sish oziq-ovqat mahsulotlarida kuzatildi — pul ifodasida 122 foizga, miqdor jihatidan esa 155 foizga oshgan. To‘qimachilik va kiyim-kechak mahsulotlari 39 foizga, uy uchun tovarlar esa 49 foizga ko‘paygan.

Wildberries taʼkidlashicha, elektron tijorat ikki tomonlama savdo uchun yangi modelni shakllantirmoqda — u yetkazib beruvchilar va xaridorlar o‘rtasida to‘g‘ridan-to‘g‘ri hamkorlikni taʼminlab, tashqi bozorlarga chiqishdagi to‘siqlarni kamaytiradi va eksport-import oqimlarini diversifikatsiya qilishga xizmat qiladi.