Toshkent, O‘zbekiston (UzDaily.uz) — 2024-yilda O‘zbekiston Respublika tovar-xomashyo birjasida (O‘zRTXB) birja savdolari orqali 2,9 tonna oltin va kumush sotilgan, bu o‘tgan yilga nisbatan 61,1 foizga ko‘pdir.

Bitimlarning umumiy hajmi 2,5 trln. so'mni tashkil etib, o'tgan yilning shu davriga nisbatan 127,3 foizga o'sganini ko'rsatdi. Taqqoslash uchun, 2023-yilda qimmatbaho metallar savdosi hajmi 1,8 tonnani (1,1 trillion so‘m) tashkil etdi.

O‘tgan yil davomida birja orqali 2535,1 kg oltin sotilgan bo‘lib, bir gramm uchun o‘rtacha birja kotirovkasi 977,5 ming so‘mni tashkil etdi. Kumush savdosi 377,0 kg ga yetdi va o‘rtacha bahosi 1 gramm uchun 11325,2 so‘mni tashkil etdi.

Birjadagi qimmatbaho metallar uchun boshlang‘ich narx Londondagi Qimmatbaho metallar bozori assotsiatsiyasining so‘nggi tonggi fiksingi asosida, O‘zbekiston Markaziy bankining birja bitimi tuzilgan sanadagi valyuta kursi bo‘yicha belgilanadi.

Qimmatbaho metallarning birja bozorida asosiy sotuvchilari AGMK va NGMK, xaridorlar esa ularni qayta ishlash quvvatlariga ega sanoat mahsulotlari ishlab chiqaruvchilari hamda zargarlik buyumlari ishlab chiqaruvchilaridir.