11 yoshli o‘zbekistonlik qiz Britain‘s Got Talent hakamlarini hayratga soldi

Toshkent, O‘zbekiston (UzDaily.uz) — O‘zbekistonlik 11 yoshli xonanda Yasmina Xusniddinova mashhur Britain‘s Got Talent shoucining 19-mavsumi saralash bosqichida ishtirok etdi.

Uning chiqishi 24 mart kuni loyihaning rasmiy YouTube kanalida «BGT Unseen» bo‘limida — asosiy efirga vaqt cheklovlari sabab kiritilmagan to‘liq chiqishlar namoyish etiladigan spin-offda eʼlon qilindi.

Sahnada Yasmina hakamlar hayʼatiga o‘zini tanishtirib, Buyuk Britaniyaga oilasi bilan kelganini taʼkidladi.

Debyut chiqishi uchun u «Eng buyuk shoumen» filmidagi «Never Enough» qo‘shig‘ini tanladi. Yosh ijrochining chiqishi zal va hakamlarda kuchli taassurot qoldirdi, ayniqsa uning vokal texnikasi alohida eʼtirof etildi.

«Ovozingiz kuchi va nazorati umuman boshqa darajada. Tabriklayman!», — dedi hakam Amanda Xolden. Alisha Dikson esa ijroda yumshoq va kuchli qismlarning uyg‘unligini alohida taʼkidladi:

«Avvali juda nozik boshlandi, keyin esa ovozingizni chiroyli tarzda ocha boshladingiz. Qo‘shiq oxiriga kelib siz go‘yo “parvoz qilayotgandek” edingiz».

Boshqa hakamlar, jumladan KSI ham Yasminaning murakkab yuqori notalarni ushlab turish qobiliyatini yuqori baholadi. Natijada u to‘rtta “ha” javobini oldi.

O‘zbekistonning Londondagi elchixonasi Yasmina mazkur shouda ishtirok etgan ilk o‘zbekistonlik ekanini maʼlum qildi va vatandoshlarni uni qo‘llab-quvvatlashga chaqirdi.

Bu Yasminaning katta sahnadagi ilk muvaffaqiyati emas. 2024 yilda u «Ovoz Bolalar» loyihasining birinchi mavsumi finalida uchinchi o‘rinni egallagan va DJ Pilgrim jamoasida ishtirok etgan.

2025 yilda esa u Italiyada o‘tkazilgan Sanremo Junior xalqaro tanlovida Gran-pri sohibi bo‘lgan.

Hozirda Yasmina butun dunyo bo‘ylab millionlab tomoshabinlar kuzatayotgan Britaniya shoucida bosh sovrin uchun kurashni davom ettirmoqda.

https://www.youtube.com/watch?v=k9bCUaRHg84&t=288s